Өскеменде жекпе-жектен турнир өтті
Өскеменде Қала күніне орай «Ұлы дала батыры» жекпе-жектен ашық турнир өтті.
Жарыс «Maxi Mall» сауда-ойын-сауық орталығында ұйымдастырылды. Биыл төртінші рет өткен турнирге Қазақстан, Қырғызстан, Ресей, Тәжікстан және Өзбекстаннан 62 спортшы қатысты.
Жарысты тамашалауға қала тұрғындары да жиналды. Көрермендер спортшыларға қолдау көрсетіп, тартысты жекпе-жектерді тамашалады.
Ұйымдастырушылардың айтуынша, турнирдің мақсаты – жекпе-жек спортын дамыту және әр елдің спортшыларын бір алаңда кездестіру.
Жарыстың алғашқы жекпе-жегінде қазақстандық Рустам Жүсіпов Өзбекстан спортшысы Дилшод Нормуродовты жеңді. Ал Азамат Жомартов Ералы Сафиолдаұлымен болған кездесуде қарсыласын екінші раундта ауырту әдісімен жеңді.
Үшінші жекпе-жекте Қуат Қазбеков Нұркен Анарбековтан басым түсті.
Ұйымдастырушылар турнирді алдағы уақытта да өткізуді жоспарлап отыр. Олардың айтуынша, келесі жарыстар қараша айында және келесі жылы ұйымдастырылмақ.
