«Жақсылық қораптары» пайда болды-Өскемен
Өскеменде мұқтаж жандарға қолдау көрсетуге арналған арнайы «Жақсылық қораптары» орнатыла бастады. Бұл бастама «Бірге жақсылық жасайық» қоғамдық қоры мен еріктілерге тиесілі.
Қазір қайырымдылық контейнерлері Карбышев көшесі, 54 мекенжайында және «Дина» базарында орналасқан. Алдағы уақытта олар «Заречный» және «Заря» (КШТ) базарларына да қойылады. Кейін әкімдік келісімімен қаланың басқа да адам көп жүретін жерлеріне орнату жоспарланып отыр.
Контейнерлерге таза киім-кешек, аяқ киім, тұрмыстық заттар мен ұзақ сақталатын азық-түлік салуға болады. Жиналған көмектің барлығы күн сайын Гуманитарлық көмек орталығына жеткізіліп, сұрыпталғаннан кейін мұқтаж отбасыларға таратылады.
Ұйым өкілдерінің айтуынша, кейде қарапайым ғана көмек қиын жағдайға тап болған отбасы үшін үлкен демеу бола алады. Сондықтан әрбір тұрғын қайырымдылық жасап, игі іске өз үлесін қоса алады.
