«Алтай Өскемен» «Атыраумен» тең түсті

Өскеменнің «Алтай Өскемен» футбол клубы Қазақстан Премьер-лигасындағы орнын сақтап қалу үшін соңғы ойындарға дайындалып жатыр.

Қазақстан чемпионатының 23-туры аясындағы кейінге қалдырылған матчта «Алтай Өскемен» «Атырау» командасымен кездесіп, 1:1 есебімен тең түсті.

Ойынның 33-минутында Ибрагим Дадаев есеп ашып, өз командасын алға шығарды. Алайда матчтың соңына қарай «Алтай Өскемен» ойыншыларының бірі алаңнан қуылды. Осы мүмкіндікті пайдаланған қарсылас есепті теңестірді.

Енді өскемендік клубты екі маңызды кездесу күтіп тұр. 25 қазанда команда өз алаңында «Елімаймен» ойнаса, 30 қазанда Алматыда «Қайратпен» кездеседі.

Бұл ойындардың нәтижесі команданың Премьер-лигадағы орнын сақтап қалуына әсер етеді. Сондықтан футболшылар үшін қалған кездесулерде жақсы нәтиже көрсету өте маңызды.