ШҚО-да қос азаматтықпен жүргендер анықталды

Өңірде көші-қон заңнамасын бұзған 18 адам әкімшілік жауапкершілікке тартылды.

Полиция мәліметінше, олардың 14-і шетел азаматтығын алғаны туралы уақытында хабарламаған. Ал тағы 4 адам Қазақстан азаматтығынан айырылса да, ел құжаттарын пайдаланған.

Жыл басынан бері өңірде Қазақстан азаматтығынан шыққан 300-ден астам адам тіркелген. Сонымен қатар қос азаматтықпен жүрген 50-ден астам адам анықталған.

Мәселен, наурыз айында басқа елдің азаматтығын алған ерлі-зайыптылар ұсталды. Олар бұл туралы уәкілетті органдарға хабар бермеген.

Тәртіп бұзушылардың Қазақстан құжаттары тәркіленіп, ел аумағынан шығарылды. Сондай-ақ оларға 5 жыл бойы Қазақстанға кіруге тыйым салынды.