ШҚО-да тұмауға қарсы екпе қашан салынады?
Өңірде тұмауға қарсы вакцинация биыл сәл кеш басталады. Вакцина медициналық ұйымдарға әлі жеткізілген жоқ.
Бұған дейін тұмауға қарсы екпе салу науқаны 15 қыркүйекте басталуы керек болған. Алайда вакцинаны жеткізу мерзімі өзгерген.
«СҚ-Фармацияның» мәліметінше, биыл тұмауға қарсы 2,2 миллионнан астам доза вакцина сатып алынған. Вакцина өңірлерге кезең-кезеңімен жеткізіліп жатыр.
Облыста вакцинаның алғашқы 19 мың дозасы 2–3 қазанда жеткізілуі тиіс. Осыдан кейін вакцина облыстағы қалалар мен аудандардың медициналық ұйымдарына бөлінеді.
Бірінші кезекте тұмаумен ауырған жағдайда асқыну қаупі жоғары адамдарға екпе салу жоспарланған. Олардың қатарында қарттар, жүкті әйелдер, созылмалы ауруы бар азаматтар, мектеп оқушылары мен кішкентай балалар бар.
Санитариялық-эпидемиологиялық бақылау департаменті вакцинаның әзірге келмегенін растады. Дегенмен мамандар вакцинация науқанын 1 қарашаға дейін аяқтауды жоспарлап отыр.
Сондықтан өңір тұрғындарына әзірге екпе салдыру үшін медициналық ұйымдарға асықпай, вакцина келгеннен кейін емханадағы ақпаратты нақтылап алған дұрыс.
