Қазақтар Наурызды неше күн тойлайды?

Елімізде Наурыз мерекесін атап өту 14 наурызда басталады. Осы күннен бастап 23 наурызға дейін мерекелік іс-шаралардың онкүндігі өтеді.

Наурыз онкүндігі – 2024 жылдан бастап енгізілген жаңа формат. Бұл күндері ұлттық дәстүрлерді дәріптеуге, бірлік пен мәдениетті насихаттауға арналған түрлі шаралар ұйымдастырылады. Әр күн белгілі бір тақырыпқа арналады.

14 наурыз – Көрісу күні. Бұл күні адамдар бір-бірімен көрісіп, туыстары мен үлкендердің үйіне барып амандасады.
15 наурыз – Қайырымдылық күні. Мұқтаж жандарға көмек көрсетіліп, қайырымдылық шаралары өтеді.
16 наурыз – Мәдениет және ұлттық салт-дәстүр күні. Концерттер, театр қойылымдары және ұлттық қолөнер бойынша шеберлік сабақтары ұйымдастырылады.
17 наурыз – Шаңырақ күні. Отбасы құндылықтары насихатталып, көпбалалы отбасыларға құрмет көрсетіледі.
18 наурыз – Ұлттық киім күні. Тұрғындар ұлттық киім киіп, салт-дәстүрді дәріптейді.
19 наурыз – Жаңару күні. Ағаш отырғызу, тазалық жұмыстары жүргізіледі.
20 наурыз – Ұлттық спорт күні. Қазақша күрес, тоғызқұмалақ сияқты ұлттық ойындардан жарыстар өтеді.
21 наурыз – Ынтымақ күні. Негізгі мерекеге дайындық жүргізіліп, дастархан жайылады.
22 наурыз – Наурыз мейрамы. Этноауылдарда мерекелік шаралар өтіп, тұрғындарға Наурыз көже ұсынылады.
23 наурыз – Тазалық күні. Экологиялық акциялар ұйымдастырылып, қоғамдық орындарда тазалық жұмыстары жүргізіледі.

Мерекелік іс-шаралардың толық бағдарламасы кейінірек жарияланады. Облыс тұрғындары Наурыз мерекесін бірге атап өтуге шақырылады.