Президент: Су тапшылығы үлкен проблемаға айналып келеді
Қасым-Жомарт Тоқаев трансшекаралық су ресурстарын пайдалану, Арал және Каспий теңіздеріндегі экологиялық жағдайға ерекше алаңдаушылық білдірді.
– Су тапшылығы үлкен проблемаға айналып келеді. Бұл ресурсты сақтау әрі ұқыпты пайдалану – еліміз бен аймақтағы өзге де мемлекеттер үшін стратегиялық, тіпті өмірлік маңызы бар басымдық. Ресей Қор жұмысына байқаушы ретінде атсалысса, бұл іске септігін тигізер еді,-деді Мемлекет басшысы.
Оның пікірінше, елдердің өзара келісімге негізделген бірлескен әрекеттері Халықаралық Аралды құтқару қорының жұмысын тиімді ете алады.
Сонымен қатар Қасым-Жомарт Тоқаев Каспий теңізінің тартылуы экологиялық қана емес, әлеуметтік-экономикалық және саяси салдарға да әкелуі мүмкін екенін ескертті. Осыған байланысты Қазақстан Каспий теңізінің экожүйесін сақтау және теңіздің тартылуын болдырмау мақсатында арнайы мемлекетаралық бағдарлама әзірлеуді ұсынды.
