ШҚО орман алқаптарында 76 миллион көшет егіледі
Алдағы екі жылда аймақта орман шаруашылығын дамытуға бағытталған ауқымды экологиялық жоба жүзеге асырылады. Жоспарға сәйкес, өңір аумағында 76 миллион жапырақты және қылқан жапырақты ағаш көшеті отырғызылады.
Бұл бастама облыстың орман қорын молайту, табиғи экожүйені қалпына келтіру және қоршаған ортаның экологиялық жағдайын жақсарту мақсатында қолға алынып отыр. Көшеттер негізінен орман өрті салдарынан зардап шеккен аумақтарда, сондай-ақ орман жамылғысы сирек өңірлерде отырғызылмақ.
Жоба аясында қарағай, шырша, балқарағай, қайың секілді жергілікті табиғи жағдайға бейімделген ағаш түрлеріне басымдық беріледі. Бұл олардың жерсінуін жеңілдетіп, орман алқаптарының ұзақ мерзімді сақталуына мүмкіндік береді.
Мамандардың айтуынша, аталған жұмыстар өңірдегі ауаның сапасын жақсартып, топырақ эрозиясының алдын алуға, сондай-ақ биоалуантүрлілікті арттыруға оң әсерін тигізеді. Сонымен қатар, орман алқаптарының ұлғаюы климаттық өзгерістердің салдарын азайтуға ықпал етеді.
Айта кету керек, көшет отырғызу жұмыстарына орман шаруашылығы мекемелерімен қатар еріктілер, жастар ұйымдары мен жергілікті тұрғындар да тартылмақ. Бұл экологиялық мәдениетті қалыптастыруға және қоғамның табиғатты қорғауға деген жауапкершілігін арттыруға сеп болады.
