Қазақстанда бензин бағасы қымбаттай ма?
Әлеуметтік желілерде бензин бағасы жақын арада күрт өседі деген ақпарат тарады. Осыған байланысты Энергетика министрлігі ресми түсініктеме берді.
Желіде тараған мәліметке сәйкес, 2025 жылғы желтоқсанда Еуразиялық экономикалық одақ елдері мұнай мен мұнай өнімдерінің ортақ нарығын құру туралы келісімге келген. Осыған байланысты 2027 жылдан бастап Қазақстандағы жанармай бағасы басқа ЕАЭО елдерімен теңеседі деген пікір айтылған.
Алайда Энергетика министрлігінің ресми өкілі Әсел Серікпаеваның айтуынша, қазіргі уақытта Қазақстанда АИ-92 бензинінің бағасын көтеруге мораторий бар. Бұл шара инфляцияны тежеу үшін енгізілген және жанармай бағасының күрт өсуі күтілмейді.
Министрлік өкілі 2027 жылдан бастап ортақ нарыққа көшу кезең-кезеңімен жүзеге асатынын айтты. Бағаның көршілес елдермен қатты айырмашылығы «сұр» экспортқа, яғни арзан жанармайдың заңсыз шығарылуына әкелуі мүмкін. Бұл ішкі нарықта тапшылық тудыруы ықтимал.
Сонымен қатар қазіргі төмен баға мұнай өңдеу саласына инвестиция тартуға кедергі келтіріп отыр. Саланы дамыту үшін Шымкент, Атырау және Павлодар мұнай өңдеу зауыттарын кеңейту және жаңа мұнай өңдеу зауытын салу қажет.
Министрліктің мәліметінше, мораторий аяқталғаннан кейін нарықтық бағаға көшу біртіндеп жүзеге асырылады. Барлық шешімдер елдегі экономикалық жағдай мен халықтың табыс деңгейі ескеріліп қабылданады.
