ШҚО-да туберкулезбен сырқаттанушылық 6,6%-ға төмендеді

Шығыс Қазақстан облысы бойынша өткен жылға арналған туберкулезге қарсы іс-шаралардың қорытындылары шығарылды. Өңір негізгі эпидемиологиялық көрсеткіштердің тұрақты төмендеуін көрсетіп, туберкулезге қарсы қызметті кезең-кезеңімен жаңғыртуда. Бұл туралы мамандар Өңірлік коммуникациялар қызметінде өткен брифингте мәлімдеді.

Шығыс Қазақстан облыстық фтизиопульмонология орталығының стационарлық қызметінің басшысы, дәрігер-хирург Болатбек Елшибековтің айтуынша, соңғы он жылда өңірде туберкулезбен сырқаттанушылық 23%-ға төмендеп, жылына 415 жағдайға дейін азайған. Өлім-жітім екі есеге қысқарып, аурудың таралуы 2,5 есеге төмендеген. Балалар арасындағы сырқаттанушылық 26%-ға азайған. 2025 жылы облыста балалар арасында туберкулезден бірде-бір өлім жағдайы тіркелмеген.

Табыстың негізгі факторларының бірі – ерте анықтаудың заманауи әдістерін енгізу. Қазіргі таңда GeneXpert аппаратында ПТР әдісі арқылы жүргізілетін зерттеу нәтижесі екі сағат ішінде дайын болады. Бұл диагнозды жедел қоюға және емдеуді уақытылы бастауға мүмкіндік береді. Дәріге төзімді түрлерін емдеу Дүниежүзілік денсаулық сақтау ұйымы ұсынымдарына сәйкес жүргізіледі. Өңірде ұзақтығы 12 айға дейінгі инъекциясыз қысқа мерзімді емдеу сызбалары дәрі түрінде қолданылады.

Сонымен қатар, көп дәріге төзімді туберкулезді емдеу ұзақтығы бұрынғы 24 айдан 6–9 айға дейін қысқартылды. Бұл пациенттердің емге бейімділігін арттырып, терапия нәтижелерін жақсартуға ықпал етеді.